“DAVEZU”
Davezu, nos caminos
que lleven a la fuente,
la xente que camina entre
castaños,
escucha, entre solombres,
eses voces
que llamen, en setiembre,
al vientu atristayáu
que vien, cola seronda, a
nuesa tierra,
xebrando acaso’l branu,
porque’l branu
tamién tiende a perdese,
quedando atrás, tan lloñe
como los versos tristes, la
poesía
que pierden, al morrer, les
hores muertes.
Davezu, nos caminos
que lleven a la fuente,
la xente que se pierde
entre eucaliptos,
escucha el viento y piensa
que, en payares,
quiciabes la xelada
pudiera ser un signu
qu’hubiera de falar,
dempués del tiempo,
del vuelu repentinu
de los ferres
que fueron a otres zones,
dexando estos llugares
desiertos, apagaos como los
cielos
que ayeri vio, al volar, la
cigorella.
Davezu, nos caminos
que lleven a la fuente,
la xente que s’avera, con
misterios,
conocen a los árboles
que esperen
el besu del orbayu,
pues suelen los orbayos
besar con llingua fina la
corteza
del troncu de los árboles
que sienten
el llantu del otoñu,
el canciu de los vientos
que cuerren cada monte,
siempre llibres,
siguiendo, siempre llibres,
a les nubes.
2014 © José Ramón Muñiz Álvarez
No hay comentarios:
Publicar un comentario