Ñuética

“LA ÑUÉTICA”

(Poema dedicao a Jimena Muñiz Fernández

y Mael Muñiz Vega,

los sobrinos de

mio)

            Nos pueblos tan de lloñe

escuchen peles nueches

les voces de los llobos,

los cancios agoreros del curuxu,

los gritos agoreros del curuxu

que dexa’l troncu vieyu,

que dexa’l carbayón en onde taba,

que vuela entre solombres

cantando-y a la muerte nos rincones.

            Y el besu de la muerte,

el besu del silenciu

asusta a les vieyines

que cunten a los nenos les hestories

de tiempos alloñaos, aquellos tiempos

de bruxes y de trasgos,

los tiempos de los cuélebres, los cuélebres

que pueblen los llugares escondíos.

            Les voces del inviernu

semeyen ser más tristes.

Y sonlo, que, dacuandu,

la xente queda  en casa, siempre triste,

callao, atristayao, como les voces

que diz el castañar,

si el viento vien violentu, porque, aínda,

les voces del invierno

anuncien la maldá, dende’l ochobre.

            Y entóncenes ye fácil

sentir les amenaces

de nieves y granizos,

si nieves y granizos, apurándose,

contesten con furor, ensin descansu,

xebrando los cristales

que zarren les ventanes de la casa,

que zarren el cuartucu

callao onde duermiera la güelina.

            La xente quier entoncia

la lluz de la alborada,

el brillu que desprende

la lluz de la alborada que, davezu,

enciende los colores nes altures

y dexa’l mundiu en calma,

si acaso ye preciso qu’esa calma

salude les montañes,

los picos de la vieya cordillera.

            Dexa-y que venga’l sol,

que lluzca, tras la nueche,

y vuelva a ser el día

quien faiga que la ñuética recoya,

que vuelva al castañar esa curuxa

que corre cada nueche

los cielos, los teyaos de cada casa,

falando del misteriu,

falando de la muerte que nos mata.

2014 © José Ramón Muñiz Álvarez